Աշխարհի ամենամեծ գանձը

Մասսաչուսեթ  նահանգի ափերից 50 կմ հեռավորության վրա  ստորջրյա  գանձ որոնող Գրեգ Բրուկսը գտել է  1942թ. հունիսի 16-ին խորտակված  բրիտանական Port Nicholson նավը:  Բրիտանական փոխադրամիջոցի վրա  ԽՍՀՄ-ից   պլատինի բեռ կար `ավելի քան 3 միլիարդ դոլար արժողությամբ:

«Ես պատրաստվում եմ ամեն գնով  հանել այդ բեռը, եթե նույնիսկ  պետք լինի նավը հանել ջրի երես: Հավանականություն կա, որ բացի պլատինից այնտեղ կա մոտ 10 տոննա ոսկի և տեխնիկական ալմաստներ», – Sub Sea Research-ից ամերիկացուն ցիտում է   «Интерфакс»-ը: Նավը գտնվում է ծովի մակերևույթից 213 մետր խորության վրա:

Գրեգ Բրուկսը ցուցադրել է մի տեսահոլովակ, որում երևում են ամենաքիչը 30 արկղ պլատինե սալիկներով, որոնք թափթփված էին խորտակված նավի բեկորների արանքում: Այդ բեռը Սովետական Միության և Ամերիկայի Միացյալ Նահանգների` զենքի համար վարձակալության  վճարների  մի մասն էր: ԱՄՆ-ի ֆինանսների նախարարության տվյալների բազայի  համաձայն,խորտակված  նավի վրա կարող է լինել 71 տոննա պլատին, ինչպես նաև ոսկու սալիկներ և ալմաստներ:

Գանձեր  որոնողը պնդում է, որ իր գտածի մասին չի հայտնել ամբողջ չորս տարի, քանի դեռ չէր կարգավորել նավը վեր հանելու գործողության բոլոր մանրամասները ԱՄՆ ֆեդերալ դատարանի հետ:

Բայց դա դեռ չի նշանակում , որ Բրուկսը և իր թիմը տեր կդառնան  հարստությանը: Միացյալ թագավորությունը նույնպես  մտադիր է ծովի հատակից հանված գանձի մի մասի նկատմամբ իր իրավունքների մասին բարձրաձայնել : Ծովային իրավունքի ոլորտի մասնագետները  պնդում են , որ  սեփականության նկատմամբ պահանջ կարող են ունենալ ԱՄՆ, Բրիտանիան և Ռուսաստանը:

Բրիտանական փոխադրամիջոցը խորտակել է գերմանական  U87 սուզանավը,  երբ ուղևորվել է Նյու-Յորքի նավահանգիստ: Հարձակման արդյունքում  անձնակազմից 4 հոգի զոհվել է , իսկ 87-ը` փրկվել  են:

http://ankakh.com

Արման Աբրահամյան